拜仁歐聯前夕奉旨歎「細」界

猪拉多纳

德甲風頭躉今晚又出動，拜仁慕尼黑喺主場對緬恩斯，入球大細中位數開到3.5球，不如冷敲入球細。雖然拜仁擺明超班，但佢哋喺哥迪奧拿執教下「搓多過射」，士哥唔算多，而且今季佢哋3次出戰歐洲賽前嗰場德甲例牌勒住，入球細有1.92倍，當然玩得過啦！

（有線61、201及中央5台周六晚9:30直播）
緬恩斯近5戰入得4球

拜仁喺國際賽期間有翼鋒梳頓沙基利受傷，加埋中場堤亞高艾簡達拿又未好番，少咗兩個進攻選擇。當然，以拜仁嘅陣容有心冇話炒唔起，不過佢哋明顯未習慣哥帥嘅歎慢板進攻節奏，開季8場聯賽入得15球，士哥仲少過淪落到要護級嘅漢堡，就算主場都未必會的起心肝開入球騷囉。

仲有，拜仁今季出戰歐超盃同歐聯前嘅3場聯賽，只係得4個士哥，反映哥迪奧拿認為聯賽冠軍坐定粒六，打歐洲賽更加重要，所以落柯打嗌球員喺聯賽避免受傷，同埋唔使贏得太盡，撞啱對家緬恩斯失去季初強勢，而且入球數字明顯下降，近5戰入得4粒，呢場仲要輸少當贏唔會亂攻，入球細好路。