容天鵬上足子彈 好利佳 係佢喇！

猪拉多纳

今季跑咗十次馬，話咁快完成咗八分一，騎師方面頭馬搓得好勻，上陣過嘅全部都贏晒，反而練馬師就仲有容天鵬同胡森捧緊蛋，睇怕佢兩個點都有啲心急，睇嚟係追開齋嘅時候喇！
       
「好利佳」休後體力回復，再打硬仗。

雖然話兩者目標一致，不過佢哋作風好明顯唔同，肥仔胡今季Q都未跑過，但係今期依然獨派「中國好」角逐頭場首本谷草1000米，睇嚟真係似武林高手無寶不落咁款。至於容家軍就唔同，硬橋硬馬嚟一招大「鵬」展翅，全日出夠8駒，除咗係今季出馬最多一次外，當中過半數都有贏面，手風順些少嘅話，開齋兼起孖都唔奇。
       

喺容天鵬今次手馬當中，「勝算高」同「紅衣精靈」啲風早就吹到一街都係，臨場只會熱上加熱，都唔需要喺呢度再講，反而第四場隻「好利佳」同組有「蜜圈」、「海之濤」呢啲名氣馬大樹遮蔭，再加埋排咗外檔，隨時會換番啲分頭，留意價值反而更高。
       
評磅員「送大禮」

其實「好利佳」健康已養番好，可惜上季連場出擊都冇運行，跑咗四個第二，搏到季尾體力下降演出自然差些少。不過就正因為對上兩場嘅敗績，暑假評磅員竟然大手減「好利佳」4分，以依家賽事咁緊湊，隨時已經等於半場、甚至一場頭馬，如果咁都唔捧吓場，真係浪費咗評磅員一番心血囉！
       
跑谷草唞氣順 金星根恨贏金碧陽光

蘇保羅旗下「金碧陽光」上季跑田草6次成為大熱都未能贏馬，今日季內初出揀谷草角逐，馬主金星根希望愛駒可贏番場。他說：「自從2010年5月『金碧亮馬』贏馬之後，大大話話已有三年多時間再未有試過以個人名義拉頭馬，真希望今季盡快打破悶局，目前『金碧陽光』係唯一希望所在。呢匹馬質素唔差，若非有呼吸毛病，落場比賽時唞氣唔順暢，根據潘頓從馬匹試閘走勢判斷，有權大勝六個馬位，所以唔難理解上季每次出賽都被捧為大熱門。為咗唔想再耽誤進度，上季尾5月決定安排『金碧陽光』接受喉部手術，但究竟效果係點，坦白講真係要跑過先知。不過今次縮程跑谷中1000米，依照賽前馬匹試谷閘後追跑第三嘅走勢，相信呢個路程有助馬匹陣上唞氣更加暢順，所以機會亦好樂觀。」
       
田泰安擺烏龍　升力益莫雷拉

田泰安同鄭俊偉嘅「升力」合作咗兩次，啱啱嗰場再跑谷草1650米，結果後追跑第二，米高鄭對呢個成績都話收貨，原本仲諗住今次繼續搵番佢騎，點知田泰安報名嗰陣一口就推咗，佢話自己已經卜咗馬騎唔到，所以米高就搵咗莫雷拉幫手。殊不知出咗排位田泰安先知自己記錯咗擺烏龍，搞到呢匹機會馬無端端益咗下家，真係有可能贏埋，白白送咗場頭馬畀拉哥做見面禮。

不過田泰安一向樂觀，對今日其他坐騎都好有信心，「勇進」同「你知我心」都係佢嘅數胡棋子，話唔定「塞翁失馬，焉知非福」！