馬利卡要爭氣 基達菲有勝格

猪拉多纳

由於今夏不獲史浩克04續約，羅馬尼亞國腳馬利卡早排曾經去咗英國，先後喺兩大北倫敦死敵阿仙奴同熱刺跟操，尤其係兵工廠主帥雲格一向貪平，依家唔使錢送上門仲唔飯應咩，點知傾唔掂數，最終喺月頭落實投効基達菲。不過馬利卡轉戰西甲即成話題人物，因為其姓氏Marica，喺西班牙文有乸型或同性戀嘅意思，甚至可以用嚟講粗口，搞到佢畀傳媒笑到面都黃，會方為免引起任何負面爭議，決定馬利卡嘅波衫只印名字Ciprian，唔印姓氏。

人要面樹要皮，馬利卡雖無過犯，畀你班人咁笑法勢係假，最好嘅還擊方法，就係喺球場上證明自己，上周中佢連省兩粒贏愛沙尼亞，帶領羅馬尼亞趕上世盃外附加賽尾班車，可見佢狀態幾弗。挾住三連勝威勢嘅基達菲，今晚喺西甲早場作客近七仗僅一勝嘅CF格蘭納達，谷埋成肚冤屈氣嘅馬利卡，仲唔趁機騷吓哥利，基軍有得受讓筍到爆，讓球客勝有買趁早。

(周日晚6時開賽)