華拉度列反底撐

猪拉多纳

齋睇牌面同人腳，西維爾冇錯係高過華拉度列，之但係西維爾兩大攻擊主將拿傑迪錫同馬高馬連都打咗柴，最恐怖係佢哋已經足足一年未試過喺西甲作客賽事贏波，咁嘅情況仲學人讓波？冇嘢呀！力求反彈嘅華拉度列主場出擊受讓平半，呢場西甲梗係捧1.82倍下盤好路啦！

（開賽時間：周一凌晨3:00）
客軍缺少馬高馬連

西維爾最近喺歐霸盃同西甲戰線都贏波，睇落好似好風光，但有跟開呢班波嘅球迷，都知佢哋客場出擊係幾屎，對上一次西維爾喺西甲作客贏波，已經要追溯番上年9月25號贏拉科魯尼亞，都咪話唔得人驚。

最令教練艾美利頭痕嘅係翼鋒馬高馬連加入咗十字軍行列，軍醫證實佢左腳腿筋受傷要抖3至4個禮拜，拿傑迪錫又話大腿肌肉酸痛未必落場。

雖然話華拉度列開季戰績好曳，8輪聯賽過後只係贏得1場咁大把，不過佢哋過往39次喺西甲主場恭候西維爾贏咗20次，和都有10次，對住西維爾嘅往績都見得吓人。況且教練桑馬天尼斯已經聞到魷魚香，係時候帶隊做番齣好戲保住飯碗，今場波敲下盤夠穩陣。