「潛艇」夠硬淨下盤頂得住

猪拉多纳

畢爾包新主場得個殼

喺西乙潛水潛咗一季嘅「黃色潛水艇」維拉利爾，今季浮番出水面重返西甲，即刻重現勁旅本色，開季至今8戰僅逢1敗，今晚佢哋作客畢爾包，力爭成為首支喺新聖馬美斯球場贏波嘅球隊，鬥志十足兼氣勢好，安高會捧佢哋受讓平半嘅1.92倍下盤。

（開賽時間：周二凌晨4:00）

目前排第4位嘅維拉利爾，能夠保住呢個位置去到季尾，拎到歐聯資格嘅話當然收貨，事實上，呢個目標絕對唔係貪心，事關佢哋擁有一條相當出色嘅防線，至今8戰只失7球，今輪之前咪只得巴塞同馬體會失6球好得過佢哋，所以話畢爾包想攻破佢哋大門，其實絕對唔容易。
杜斯山度士今季已入4粒

再者，「潛艇」前線有愈踢愈好嘅墨西哥國腳杜斯山度士押陣，呢個前巴塞球星今季已經入咗4粒波，今場會係畢爾包心腹大患。

對手畢爾包今季嘅主場同作客演出簡直差天共地，今季佢哋主場4戰取得3勝1和，反而客戰只得1勝3負。值得注意嘅係畢爾包今季自9月中起，正式搬到新聖馬美斯球場作戰，雖然睇落個主場係威係勢，威力強勁，但查實只係對手實力麻麻，所砌低嘅只不過係切爾達同貝迪斯呢類中下游球隊，今晚佢哋對住呢部出水「潛艇」，小心連個主場嘅不敗招牌都畀人拆埋。