富咸主力復出救波士

猪拉多纳

水晶宮亂咁試陣反彈唔易

英超周一獨腳戲有護級大戰上演，由排尾2嘅水晶宮主場火併尾4嘅富咸！富咸開季以來表現未達預期，今仗一旦輸波，有傳領隊祖爾隨時食豉椒炒魷，好彩佢哋有多名傷兵主力復出，憑住較佳質素，唔難贏波救波士。足智彩開平手盤，力奇捧客隊！

（now621台周二凌晨3:00直播）

富咸今夏引入唔少高質素新兵，季前唔少球評家都睇好佢哋有力殺入前10，甚至攞到歐洲賽資格，點知踢落班人唔多對辦，至今7戰只得7分，前線只入5球，之前幾場波祖爾已經畀球迷噓爆，如果今晚有乜冬瓜豆腐，一向絕少炒人嘅富咸董事局恐怕或者會被迫出手。
貝碧孭番飛柏加候命

好彩嘅係，經過個幾星期嘅國際賽期，上仗中途因傷退下火線嘅射手貝碧托夫同隊長軒治蘭特，今晚應該都可以再次擔正。至於小腿傷嘅中場大腦柏加同進攻中場泰拉拔都可以候命，前場齊晒腳，以佢哋嘅實力，要贏水晶宮又有幾難？

主隊呢邊，開季7戰只得1勝，同新特蘭都被視為降班膽。事實上，佢哋今季唯一勝仗就係砌低包尾大幡新特蘭，海軍鬥水兵，贏波都不足為據啦！佢哋依家4連敗，連主帥荷路維都話只期望班人可以踢出尊嚴。最慘係佢哋今季踢7場波已經用咗24名球員，到現時都未試到理想陣容，排陣百分百係「星期美點」，款款唔同，球員又點踢到好波？今晚都係等炒啦！