阿仙奴 多交收

猪拉多纳

華麗中場缺口畀蜂針

兵工廠火力全開，小心「蜜蜂」尾後針！今晚歐聯死亡F組第3輪重頭戲，英超榜首阿仙奴坐鎮主場火併德甲二哥多蒙特，雖然兵工廠猛將奧斯爾、艾朗藍斯、韋舒亞組成「華麗中場」，個個槍法奇準，踢到咁順定必搶攻，但少咗悍將法米尼喺後面「掃垃圾」，隨時畀「蜜蜂仔」嘅快速突擊拮到變豬頭，呢場入波唔會少，阿仙奴要讓波唔多穩陣，寧玩大盤。

（有線61及201台周三凌晨2時45分直播）

今季阿仙奴買入貴價貨奧斯爾後，猶如喺手槍上裝咗準星，激發其他槍手提升射門準繩度，喺箭頭基奧特掩護下，奧斯爾、艾朗藍斯、韋舒亞及辛迪卡索拉等猶如穿花蝴蝶般，互傳走位輕易撕破對手防線，其中韋舒亞自月初打破千幾日英超入球荒後，連續兩場有士哥，辛迪卡索拉傷愈復出後，令球隊進攻更加流暢，加上「入波死神」艾朗藍斯腳風順到冇朋友，個個着晒火頻有士哥，好睇又好食。
法米尼未必出 益咗多蒙特

阿仙奴踢番出華麗足球，鐵血防中法米尼亦係不可或缺，上仗佢同諾域治球員火星撞地球後，因出現腦震盪被迫退下火線，今仗上陣成疑。阿仙奴冇咗呢位「垃圾佬」喺防線前做好掃蕩，勢必令轉身慢過蝸牛嘅中堅梅迪薩卡及衝動派後衞哥斯尼大出洋相，特別係多蒙特嘅馬高列奧斯、米希達利恩及奧巴美揚快如閃電，箭頭羅拔利雲度夫斯基把握力強，加上兵工廠主攻踢法，反而啱晒「蜜蜂兵團」打反擊，你一拳我一腳士哥必多，阿仙奴讓平半可勝不穩，斯維寧捧較穩陣嘅入球大。