分組賽編排ＮＢＡ式逐場計

猪拉多纳

今晚F組重頭戲係阿仙奴主場對多蒙特，未講兩隊特色同今場看點前，Peter希望大家要瞭解一樣嘢，歐聯分組賽最微妙之處係第三、四場對手完全一樣，只係主客對調，兩支旗鼓相當嘅球隊喺短短時間內兩次碰頭，若然拎到一贏一和，相信任何教頭都收貨。

其實圈內人都知當對住非善男信女嘅同級對手係好難部署，尤其依家歐洲頂級教練個個都咁有料，識得對症下藥，而且球員適應能力又高，要贏晒兩場談何容易呢！呢種情況好似NBA或者職棒系列賽，無論係七場四勝制定五場三勝制，全部都係逐場計，每一仗都好可能扭轉局勢。
多阿唔同戰術一樣Work

多蒙特同阿仙奴新季喺聯賽打得唔錯，佢哋同樣實至名歸，上屆歐聯亞軍多蒙特勝在有好教練高普，佢好懂得發揮自己套高效高速戰術，當球員一失去控球後，十五秒內就喺前場搶番人地個波，行軍快速。拜仁主帥哥迪奧拿擅於用控球做絕招，而高普就以緊逼作為殺着，效果都係咁理想。

阿仙奴領隊雲格不嬲鍾意悅目足球，今年用高價買入奧斯爾，佢激活咗艾朗藍斯同韋舒亞，計功效絕對係超值價！加上辛迪卡索拉及阿迪達等高手，就算阿仙奴冇十全十美嘅防中，而且缺乏一個正宗控球球員，踢落一樣咁好。「兵工廠」能夠喺歐聯死亡F組兩戰兩勝，反映大軍戰術相當有效。

Peter向來鍾意睇防守戰術，但呢兩隊波畀咗大家一個啟示，就係用唔同戰術都可以做得好，睇波最緊要深入淺出，分析要夠客觀先得！