蘇偉賢上位快人一步

猪拉多纳

剛周日賽事容天鵬馬房終於憑冷門馬「多多心得」開齋，不過如果要比較兩位新任練馬師嘅成績，暫時都仲係以Chris蘇偉賢比較叻仔，依家馬季只係進行咗八分一，佢三扒兩撥已經累積咗5場頭馬，如果能夠保持呢個走勢嘅話，季尾埋數隨時有三、四十W都唔出奇。今晚賢廐出3駒，有冷有熱，雖然剛周日斷纜，但以之前連贏四期股氣勢，當然繼續有留意價值。
       
快人一步

查實蘇偉賢咁快交到好成績，都確實唔係靠運o架，就攞從練第一匹頭馬「快人一步」嚟講，出賽體重足足比上手養嗰陣重咗成60磅，連曾經驗到內出血嘅體弱馬都養得咁壯，就知道阿Chris確實係有兩道功夫仔啦！
       
上場贏馬姿態誇張

計番「快人一步」上場贏馬姿態，又的確係幾誇張嘅，沿途快跟之下，末段居然保持勁勢彈甩輕勝，除咗話係脫胎換骨之外，都唔知用咩嚟形容至好！今次升班負輕磅，身材高大嘅安國倫無緣再騎，好在搵嚟快活谷攝位王黎海榮接棒，威力可以話有增無減，同組對手「金滿載」要贏嘅話，肯定要先過呢關！