安德列治青春班難擋PSG

猪拉多纳

歐聯C組比利時安德列治主場迎戰法國巴黎聖日耳門（PSG），Anton一直follow緊雙方近期比賽，今場係強弱懸殊之戰，財大氣粗嘅聖日耳門可以好輕鬆贏波，推介讓球客勝。

（有線63台周四凌晨2時45分直播）

安德列治已經連奪5季比利時甲組聯賽錦標，不過今季決心年輕化，難免帶來陣痛，喺聯賽踢11場已經輸咗4場，暫居第5位，碰上較有實力嘅球隊全敗，面對強隊更接連大敗，上輪歐聯主場面對希臘奧林比亞高斯，結果淨吞三蛋，近期球隊情況更差，陣中幾名較有經驗戰將都要養傷，近兩輪聯賽先喺主場負於實力平平嘅哥治，上輪作客贏弱旅蒙斯，但都畀對手攻到失暈，Anton唔怪安德列治球員，因為對蒙斯一役排出一個「BB陣」，11個正選球員平均年齡只有21歲，包括年僅16歲、97年5月至出世嘅中場泰利文斯，全隊最老經驗嘅，亦只係25歲嘅阿根廷射手馬迪亞斯蘇亞雷斯，班波年輕得咁緊要，根本未夠火喉出席今晚大場面。
伊巴卡雲尼着晒火

另一邊廂，有卡塔爾富豪撐腰嘅聖日耳門，經過近兩季瘋狂擴軍後，於名帥白蘭斯手上已成為歐洲其中一支最頂級球隊，除咗喺法甲以不敗身領導群雄外，於歐聯兩戰面對奧林比亞高斯同賓菲加都輕鬆大勝，喺呢組超晒班，而且白蘭斯對歐聯十分重視，上輪聯賽面對巴斯蒂亞只係半力出擊，一雙超級箭頭伊巴謙莫域同卡雲尼各踢半場，但每人45分鐘就足以包辦4個入球，今晚蓄銳撲擊BB班安德列治，大勝在望。