拜仁鬥柏辛「-2」照捧

猪拉多纳

哥迪奧拿下令開波就搶攻

今晚歐聯D組有榜首嘅德甲班霸拜仁，主場迎戰同組實力較次嘅柏辛域陀尼亞，雖然拜仁由開季到依家愈踢愈好，但要求極高嘅哥帥仍然唔滿意，更落「柯打」叫班球星一開波就喪攻，咁搞法客軍今晚分分鐘渣都冇得剩，[-2]都照捧1.63倍「讓主」啦！

（有線62及202周四凌晨2:45直播）

哥迪奧拿嘅成功之道，相信係源自佢嗰種律己以嚴嘅態度，佢對麾下球員嘅要求亦係非常之高！家陣拜仁喺今季9場聯賽獲得7勝暫列榜首，但哥帥依然唔滿意，皆因呢支德甲班霸今季對住擺出「鐵桶陣」嘅對手，有幾場賽事都唔能夠喺上半場取得進帳，哥帥話：「我唔鍾意依家上半場嘅表現，唔想叫班球迷下半場先入場睇波囉，但我哋會改變。」擺到明落「柯打」叫班手下猛將由第1分鐘開始就狂攻啫！
湯馬士梅拿近5戰入6球

今仗對住柏辛域陀尼亞，佢哋的確有能力上演一場大屠殺，除咗湯馬士梅拿近5場勁入6球之外，洛賓同文迪蘇傑嘅腳風都頗順，加埋列貝利已經復操，今場有望後備落場，鋒線兵源充足絕對可以玩殘對手條防線。拜仁今戰雖然有後衞謝路美保定停賽，但面對鋒力唔強嘅柏辛，照計唔會有咩大問題。

嚟自捷克嘅客軍柏辛域陀尼亞近況唔算太好，6戰僅得3勝，佢哋喺歐聯首場分組賽主場鬥拜仁手下敗仗曼城都要淨吞3蛋收場，近8戰亦都只係得1場冇失波，防守已經唔算穩陣，今晚作客話明要搶攻嘅拜仁，想唔大敗都幾難！
Data King 柏辛近4戰半場皆失守

‧拜仁慕尼黑近7戰有5場至少攻入3球。

‧湯馬士梅拿近5仗有2次為拜仁先開紀錄。

‧柏辛域陀尼亞連續4仗上半場都有失波。
歐聯D組