悉尼打吡 吼流浪者客Ｗ

猪拉多纳

今日澳職上演悉尼打吡，FC悉尼主場對西悉尼流浪者，FC悉尼上仗慘吞4蛋之餘，仲有首席球星迪比亞路及中場名將艾馬頓受傷，兩位正副隊長今仗好可能一齊缺陣，軍心勢必大受動搖。另一邊廂，有傳水晶宮想請流浪者教練普波域領軍，呢位40歲少帥梗係要趁機顯功架，踩住FC悉尼而上，博去英超搵食。Mic少睇好流浪者一鼓作氣，打開今季勝利之門，捧客勝。
FC悉尼正副隊長都傷

FC悉尼原本開局唔錯，迪比亞路首仗已開齋，但上輪踢咗半個鐘就傷出。球隊之後兵敗如山倒，連失4球畀布里斯班獅吼，可見呢位意大利球星唔只係FC悉尼嘅入波希望，仲係精神領袖，球隊缺少佢，即陣腳大亂。禍不單行係曾經効力布力般流浪嘅艾馬頓同樣有傷在身，若然冇咗呢兩位名將壓場，FC悉尼士氣及實力都會大打折扣，情況悲觀。

西悉尼流浪者雖然開季兩戰皆和，但話晒係上季常規賽冠軍，級數遠凌駕連季後賽都冇份踢嘅FC悉尼。教練普波域近期心情靚爆，事關有傳水晶宮想請佢執教，普波域球員生涯曾効力水晶宮5年，朝中有人好辦事，回巢機會樂觀，但最重要係佢必須盡快帶領流浪者走出近期低谷，否則好難說服水晶宮董事局同佢簽約。今仗打吡戰備受矚目，普波域肯定使出混身解數搶3分。