巴塞 皇馬升呢 4「大」球王開拖

猪拉多纳

殺到嚟啦！西甲「國家打吡」今晚喺魯營上演，巴塞鬥皇馬大家睇得多，唔同嘅係今次兩軍教練馬天奴、安察洛堤，以及兩大球星尼馬同加里夫巴利都係第一次參與呢個盛事，令「國家打吡」升呢之餘更增添一份新鮮感！家陣美斯有尼馬幫手，C朗就有巴利做拍檔，四大球王合演「士哥大戰」，一於熱捧1.5倍入球大啦！

（now632台周日凌晨0:00直播）
巴利擔正 迪馬利亞艦隊百戰

西甲今季三強鼎立，巴塞暫時位列榜首，分別多馬體會同皇馬1分同3分，稍有差池隨時畀馬體會過頭，所以今仗唔單止係一場6分波咁簡單，仲直接影響到爭標形勢！「球王」美斯傷愈復出只用一場多啲就重拾射門鞋，而且今次仲有尼馬喺身邊鋪橋搭路，兩大射手為巴塞攻堅，皇馬「殺人王」比比唔知要追住美斯定尼馬踢呢？

皇馬每逢對巴塞，例必做好防務工作，但係有幾多次可以保住清白身離場先？反而進攻利用C朗嘅速度同爆發力，往往拎到唔少着數。近4仗入6球嘅C朗狀態冇得彈，今晚對住主攻嘅巴塞肯定大把機會打反擊，而且安察洛堤賽前表示加里夫巴利已經做好擔正嘅準備，《馬卡報》尋晚仲話狀態大勇嘅迪馬利亞亦會正選上陣，第100次代表皇馬披甲，即係話，肥安有可能擺出「C朗+迪馬利亞+加里夫巴利」呢個恐怖攻擊組合。
碧基打柴 巴塞防線靠唔住

再者，巴塞同皇馬防線都有隱憂，巴塞今晚雖然有佩奧爾復出，點知賽前又傳出碧基受傷嘅消息，意味住頻頻蝦碌嘅馬斯真蘭奴可能會繼續留喺正選陣容，至於皇馬連續4場作客賽事加埋失咗6球，面對美斯同尼馬又點會唔失波呢？今場大家坐定定等睇「入球騷」都得啦！
Data King C朗戰魯營6仗入8球

皇馬射手C朗近6次造訪魯營均有進帳，合共攻入8球。

C朗每逢聯賽入波，皇馬從未落敗，成績為84勝6和。

按2.5球中位數計算，近10次「國家打吡」開出9大1細。
乜都玩錦囊 皇馬受讓半一捧得過

巴塞嘅魯營威力幾勁唔使多講，不過今場話晒係「國家打吡」，皇馬照秤人腳根本唔輸蝕，巴塞讓半一明顯辣得滯。再者翻查往績，巴塞最近3次喺主場惡鬥皇馬，而同時開出讓半一盤嘅比賽，「地上最強」全部輸盤而回，今場一於再追「銀河艦隊」下盤。