恒大三叉戟衝散首爾

猪拉多纳

15000Fans飛抵南韓打氣

亞洲巔峰對決今晚爆發！廣州恒大（足智彩譯FC廣州）成為首支打入亞冠盃決賽嘅中國球隊，今晚會喺首回合作客南韓FC首爾，恒大孔卡、穆里奇及艾傑臣組成嘅「亞洲第一三叉戟」，加埋近15,000名作客球迷助威，對住FC首爾近排頻頻出錯嘅防線，要贏波唔難，一於捧1.82倍客勝！

（now670台周六晚6:30直播）
孔卡臨別要捧盃回報球迷

恒大今次創造歷史，梗係成為全國焦點啦！據講今次除咗球員太太團親臨助威，更有15,000名粉絲去首爾撐場，恒大方面亦幫佢哋準備好晒打氣嘅衫同用具，小妹早前親身上廣州睇恒大對柏雷素爾場4強次回合，可以肯定佢哋班Fans嘅打氣威勢絕對唔會輸蝕畀主隊，相信可以幫恒大喺客場踢出氣勢。

恒大陣中最矚目嘅，當然係孔卡、穆里奇同艾傑臣組成嘅「南美三叉戟」啦，其中喺季尾約滿嘅孔卡，盛傳會喺下周落實轉會事宜，但佢亦深受最近數場發起「挽留行動」嘅球迷所感動：「我要盡全力贏冠軍回報球迷！」恒大前主帥李章洙日前就向南韓《首爾體育》表示，呢3位攻擊手已經屬於亞洲最頂級，呢條攻擊線今季12場亞冠盃賽事就貢獻咗24個入球，亦包辦咗8強開始4場賽事嘅14個「士哥」，火力之強可以用「恐怖」嚟形容！
首爾4戰不勝後防多漏洞

反觀佔地利嘅首爾近況似乎唔太理想，近4戰不勝之餘仲失咗6球，同亞冠盃4強次回合前連續5場零失球嘅強勢相比，防線似乎出咗漏洞兼信心危機，恒大一班超級攻擊手自然有機可乘！而且首爾近3場聯賽僅得1和2負，積分榜排名已跌落第4，雖則話係因為分心應付亞冠盃所致，但難免對士氣有一定打擊，今場睇怕要喺鄉親父老面前失禮啦！