雙S默契好博紅軍「讓球和」

猪拉多纳

利物浦喺9月底試過3場不勝，但自蘇亞雷斯坐完波監復出後，就成功帶領「紅軍」走出谷底，暫時喺聯賽榜排第3位。利物浦今晚主場迎戰近5戰不敗嘅西布朗，小妹相信利物浦可以小勝，捧3.55倍「讓球和」啱數！

（now621及630台周六晚10:00直播）
西布朗行積分花紅激勵士氣

「紅軍」開季靠史杜列治支撐拎到3連勝，但之後兩場聯賽只得1和1負，好在「哨牙蘇」及時復出，呢對「S&S」組合喺近3場聯賽合共攞到6個士哥，當中史杜列治仲經常助攻畀「哨牙蘇」，睇得出佢哋默契唔曳。雖然上仗只打和紐卡素，但今晚返到自己地頭，「紅軍」肯定想贏波向榜首阿仙奴繼續進逼。

西布朗近態唔曳，連續5戰不敗，作客奧脫福都贏咗曼聯2:1，之後主場又1:1摸和阿仙奴，而且重賞之下必有勇夫，會方早前訂下「積分花紅」，球隊喺聯賽每拎1分，球員就有5,000鎊花紅，但大前提係球隊要成功護級，否則球員得個「桔」，所以每場波都踢得特別搏命。不過，利物浦實力始終佔優，兼夾有地利，要贏波應冇難度，但就好難大炒，隨時都係煲魚生粥僅熟！