馬體會恰慣格蘭納達

猪拉多纳

喺西甲追到班霸巴塞隆拿氣咳嘅馬德里體育會，今晚聯賽快車作客對住畀佢「恰」慣嘅CF格蘭納達，要攞3分易過借火，特別係格蘭納達喺前季重返甲組以來，4戰馬體會連波都入唔到球，即係鋪鋪等炒。馬體會讓波，2.4倍「讓客」要捧呀！

（now632台周五凌晨3:00直播）
格蘭納達交手3連敗冇波入

馬體會目前排喺西甲次席，落後打多一場嘅巴塞4分，形勢緊湊。佢哋今季一直表現出色，聯賽10戰9勝氣勢勁爆，射手迪亞高哥斯達近6場就轟入8球，再加上韋拿都腳風唔曳上場省兩粒，呢個星級進攻組合實力唔嘢小，要撕破格蘭納達防線又有幾難？

主隊格蘭納達排第13位表面睇唔曳，但10場僅入6球係全西甲火力最差球隊。更恐怖係呢班波自前季重返西甲後，就只係對住馬體會及艾美利亞未入過波，撞親剋星連入球能力都冇埋，馬體會無後顧之憂，以佢哋近3次交手全勝格蘭納達嚟睇，應該唔難再大勝一場。