拜仁搶「芬」衝紀錄

猪拉多纳

丹迪 馬天尼斯復出

已經跨季35場德甲不敗嘅拜仁，今晚作客迎戰賀芬咸。只要佢哋今場唔輸，就可以追平漢堡喺81/82至82/83年球季創下嘅36場聯賽不敗紀錄。話就話打和都可以追平紀錄，不過拜仁又點會甘心攞得1分走？而且中場查維馬天尼斯、中堅丹迪復出，陣容更見完整，要炒起唔識防守嘅賀芬咸有幾難，拜仁讓一球，撐1.63倍「讓客」。

（有線61、201周六晚10:30直播）
列貝利專恰賀芬咸

挑戰得漢堡呢個不敗紀錄，拜仁梗係想大勝一場嚟省靚招牌。其實唔止拜仁，就連列貝利都要挑戰自己。呢位法國中場自從喺上年4月聯賽輸畀多蒙特，喺之後自己有份落場嘅39場德甲賽事都未輸過。而且佢對上3次同賀芬咸交手，一共入咗3粒，今仗添食唔出奇。何況左閘阿拉巴又啱啱當選2013年度奧地利最佳運動員，肯定加強信心。翼鋒馬里奧葛斯又成功融入隊波，近3仗後備上陣都貢獻2個入球同3次助攻，提高球隊變招能力。

賀芬咸踢法有前冇後，所以佢哋同布倫瑞克一樣成為聯賽失球最多嘅球隊。但係拜仁有查維馬天尼斯同丹迪復出，賀芬咸想偷雞入波唔容易，隨時掛住上前攻而畀拜仁頻頻打反擊得手。