摩法神采捲土重「萊」

猪拉多纳

　　阿棟一向有留意隔夜賠率，有啲馬熱得唔合理，或者冷得太過分的話，就算係自己心水，一定起疑問，唔會盲舂舂照買。當然，唔係賠率一有古怪就代表一定唔得，不過，作為賭仔，提高警覺冇錯，真金白銀嚟架，梗要認真對待。

　　第七場三班1000米草地。「輕彈錢笑」賽前傳出曾有腳傷，又試過缺席操練，係就係有條刺，諗深一層，如果隻馬未好番，阿蔡唔會夾硬要跑，因為跑傷咗，肯定得不償失，例不如睇定啲再報名，所以，畀佢跑得，應該唔會有問題。

　　輕彈錢笑信得過

　　呢匹「輕彈錢笑」上季可以在四班一出即勝，實力點會平庸，三班一定唔會有阻力，由好手莫雷拉壓陣，更加信得過。

　　第十場三級賽1800米草地。「金秋」唔知係碎料，定係遲熟，跑落成績冇乜改進，上季初出跑完個第二，之後場場冇P，但輸還輸，隻馬通常輸得唔遠，同埋，韋達一直未肯放手，基於呢兩點，希望隻馬係因為遲熟，今季會愈跑愈好，呢次跑啱路程，一於先試一注。

　　大摩部署有心機

　　第十一場二班1650米泥地。「摩法神采」恨贏恨到發燒，自12年7月季尾贏完，守齋至今。睇見大摩好有心機部署，幾乎跑親泥地實搏命，就知好有計劃。今次由1200米轉爭一哩，路程當然更合腳法，續用杜利萊，配搭硬淨，勝利在望。(陳華棟 資深評馬人)