讓球客勝今刺掂！

猪拉多纳

熱帶鋒暴吹襲愛華頓

香港11月罕有地仲有風打，而英國利物浦市亦受到「熱」帶「鋒」暴侵襲，已升呢成為爭標分子嘅熱刺強勢作客愛華頓，熱刺今季後防極穩，聯賽對住非倫敦市球會未失過波，但最得人驚係中前場外援質素超晒班，鋒力之強已達頂級勁旅級數，作客葛迪遜公園真係未驚過，「拖肥糖」要做好防「鋒」措施已經唔易，仲要讓波就更唔合理，揀讓球客勝！

（now 621周日晚9時30分直播）
新星互片 唐辛Vs巴克里

安祖斯唐辛趁艾朗連儂養傷搶走正選位置，連儂近期已復出，但狀態唔及唐辛咁sharp，呢隻快翼不單夠快，仲鬼咁射得，之前代表英格蘭射爆黑山大門盡顯功架！英倫傳媒對唐辛評價好高，大讚教頭保亞斯以自家青訓產品取代天價轉投皇馬嘅加里夫巴利，呢位小將未有飄飄然，保持穩定發揮。

另一邊廂愛華頓新星巴克里早於莫耶斯時代已不時有機會落場，莫帥今夏帶埋球隊中場重心費蘭尼投奔曼聯，新帥馬天尼斯索性將巴克里視為重建計劃核心成員，高度重視呢位進攻中場。巴克里傳得射得，表現同樣獲得各界認同，就算背住「新朗尼」招牌亦未有畀壓力影響演出，確實相當叻仔！
對非倫敦球會 保持不失

除安祖斯唐辛外，熱刺中前場幾名外將如蘇爾達杜、基斯甸艾歷臣同荷西保連奴等個個獨當一面，後備迪科爾狀態又弗爆，進攻瓣數多，爭勝本錢充足。熱刺唯一隱憂係正副選左閘丹尼路斯同基爾洛頓都有傷，但搵維頓漢串演問題應該唔大。佢哋今季只怕踢倫敦打吡，聯賽失5球來自3戰同市球隊，其餘6場全勝兼冇失波，堅硬淨！

愛華頓跨季聯賽主場10戰9勝1和，贏過曼城同車路士，冇乜好挑剔，今戰只有中場吉遜同箭頭干尼倦勤，但兩人都非必然正選，冇乜影響。「拖肥糖」條件本來唔差，但最衰要讓波，熱刺今季已升呢成為爭標分子，愛華頓未夠班讓佢哋，讓球客勝係正路之選。