拖肥熱刺火力勁 大騷開唔停

猪拉多纳

今季英超最令球迷覺得驚喜嘅球隊一定有「拖肥糖」愛華頓份！開季至今9戰5勝3和1負，暫時排喺積分榜第6位。今晚「拖肥糖」主場出擊迎戰熱刺，兩隊鋒力都犀利，預料會合演「入球騷」，一於捧2倍入球大！

（now621台周日晚9:30直播）
愛華頓主場10戰8勝2和

由車路士借番嚟嘅前鋒盧卡古近5場聯賽有6個士哥，協助「拖肥糖」升上第6位。車仔領隊莫連奴今鋪真係走漏眼，講到今季表現，盧卡古嘅狀態仲Fit過伊度奧同丹巴巴亞，「寸王」將呢個「小魔獸」外借出去完全係計錯數啦！唔只咁，近期人氣急升嘅奧士文，上場作客阿士東維拉後備入替小將巴克里，即刻交出一個助攻同一個入波，賽後領隊馬天尼斯都大讚佢嘅表現係大師級，相信今晚好大機會復任正選。
葛迪遜交手旺開大

至於傷愈復出嘅派拿喺對侯城一役，又係後備登場第一腳就射破對手大門，家陣「拖肥糖」成班波都狀態唔錯，而且主場威力不嬲強勁，近10場主場都未輸過，有8勝2和成績，今晚佢哋要入番幾球又有幾難？

另邊廂嘅熱刺亦人才鼎盛，得分點平均，好似蘇爾達杜、迪科爾、基菲爾施古臣、基斯甸艾歷臣同埋荷西保連奴等都係卡士十足嘅進攻球員。最緊要熱刺一向踢作客波都冇話腳軟，近10場客戰就贏出8場，兼有25球進帳。兩班波都咁攻得，近4次喺葛迪遜公園碰頭又有3次開入球大，今晚梗係繼續追大啦！