博洛尼亞反彈割「禾」

猪拉多纳

今晚意甲有場獨腳戲，由博洛尼亞主場出戰基爾禾。雖然博洛尼亞早前經歷開季8場不勝，但係佢哋最近強勢反彈，連贏2場。相反基爾禾持續頹勢，呢班波已經6連敗，繼續排喺榜尾，反底未係時候，1.95倍主勝唔好錯過。

（TVB301周二凌晨3:45直播）
基爾禾作客啞火

博洛尼亞今季要踢到第9場聯賽先開齋，唔係因為佢哋鋒力不足，而係因為防線犯錯多。不過經主帥皮奧利改派守將雲尼卡軒拍住費達歷蘇連遜等人上陣後，防守明顯有改善，近兩場更保持清白身。兼且首席射手迪亞文迪今仗刑滿復出，佢冇畀兩連勝衝昏頭腦，賽前反而提醒隊友要集中精神應付。佢哋咁認真，就算中場亨利基文尼斯休戰，想延續球隊今季主場必有波入紀錄唔難。

對手基爾禾最近連輸6場，士氣唔慌好得去邊。表面上睇佢哋上仗對羅馬輸1球似乎唔差，但睇真啲佢哋連續9場聯賽都有失球，後防漏洞唔少。而且呢班波一作客就唔識入波，5場作客入得1粒咁多，何況中場希迪馬治、卡利路又缺陣，咁好難搶到分囉。