曼城殲滅陸軍 「6分波」主場冇甩拖

猪拉多纳

今屆歐聯英超四支參賽球隊成績不俗，Ｄ組曼城暫時僅次於上屆盟主拜仁，都算有交代。其實曼城喺比歷連尼執教下，歐聯演出比文仙尼時代有明顯改善，呢支富豪球會最想係歐聯攞到成績，每場都搏盡，更何況球隊出線位置未穩，今輪主場必定強攻莫斯科中央陸軍，捧1.51倍讓球主勝。

（有線62及202台周三凌晨3時45分直播）

中東富豪文梳亞入主曼城，同車仔老闆阿布一樣，攞完英超冠軍就想稱霸歐洲。球隊今季重心放喺歐聯，比賽態度好認真，踢得有板有眼，除咗輸畀拜仁，另外兩仗都順利贏波，包括上次作客擊敗中央陸軍，曼城依家只領先中央陸軍3分，能否出線16強今仗相當關鍵，最好就係贏出今場「6分波」。
陸軍作客聽炒

曼城最大優勢係人腳鼎盛，多線作賽都唔怕，球隊各人為爭正選都會搏盡，上仗英超半場領先4球都唔留力，結果大炒諾域治7比0，遇上爭出線對手中央陸軍，更加唔會留手。

中央陸軍近年喺俄超嘅風頭畀辛尼特蓋過，去到歐聯只屬陪跑分子，睇佢哋上次對曼城，球員埋門把握力低成輸波死因，有地利都唔掂，今仗遠赴英格蘭比賽，形勢更惡劣，淨輸兩球或以上好正路。