拜仁柏辛域「大」打出手

猪拉多纳

今晚歐聯D組有衞冕冠軍拜仁慕尼黑，作客捷克對榜尾嘅柏辛域陀尼亞。拜仁喺「最佳新手」哥迪奧拿領導下愈踢愈順，火力亦重返巔峰，要大炒防守唔掂嘅柏辛唔係難事，不過拜仁近期嘅防守亦都有不穩，攻強守弱，入球中位數即使開到3.5，都係捧1.95倍「大」比較啱數。

（有線63周三凌晨3:45直播）
洛賓有傷缺陣

哥迪奧拿首季帶領拜仁就奪得聯賽開季11場不敗，成為德甲史上最佳「新手」教練，佢以進攻為主嘅風格亦都喺近期嘅拜仁身上完美呈現，呢支德甲班霸最近4場賽事斬獲14球，回勇嘅主力前鋒文迪蘇傑更喺近兩戰取得3球進帳，新援馬里奧葛斯亦有上佳表現，就算洛賓今仗因傷缺陣，要喺近4戰得1勝、3場分組賽勁失11球嘅柏辛域陀尼亞身上入番幾粒亦冇難度。

不過呢隊拜仁絕對唔係完美o架，最大嘅問題當然係防守啦，佢哋近6戰只係得上仗主場鬥柏辛域陀尼亞嗰場可以保得住清白之身，最近3場德甲聯賽亦都係先失1球下反勝，雖然柏辛域陀尼亞火力一般，但話晒有拿積度拉等攻擊手喺度，「偷雞」唔係冇可能o架。