皇蘇包緊艇 唔敢歎「曼」板

猪拉多纳

贏吓一場，贏吓又一場，曼聯呢排表現好似好掂，實情連場勝仗只係對手實力一般，唔足以反映真正狀態。「紅魔」今晚喺歐聯A組造訪皇家蘇斯達，主隊啱啱喺西甲大炒奧沙辛拿振奮軍心，為保出線希望肯定搏到盡，皇蘇受讓平半，梗係要1.85倍下盤啦！

（有線64及203周三凌晨3:45直播）
曼聯3連勝屬虛火

曼聯最近喺本土賽事錄得3連勝，但對手分別只係史篤城、諾域治同富咸呢3隊二打六，老實講贏係應該o架喎！有睇周日凌晨贏富咸場波嘅球迷，都見到曼聯開波唔夠25分鐘就領先3粒，好大程度係因為對手防線實在太豆腐，富咸下半場站穩陣腳之後，「紅魔鬼」就即刻無從入手，造訪近4場主場賽事僅失1球嘅皇蘇，唔係咁易食o架！

「紅魔鬼」喺A組揸住7分排榜首，3戰全敗嘅皇蘇就敬陪末席，想保住一絲出線希望嘅話，今仗唔可以再有差池。佢哋近3場西甲錄2勝1和佳績，上輪聯賽仲大炒奧沙辛拿5蛋，士氣可謂冇得頂。
射手基沙文腳風順

最重要係法國射手基沙文呢排着晒火，淨係近3仗已經喪入5球，佢賽前仲豪言：「只要數字上仲有機會，我哋都唔會放棄！」由佢夥拍施費洛域同卡路士韋拿合組嘅三叉戟絕對唔講得笑。況且皇蘇上輪歐聯作客曼聯唔係冇攻勢，基沙文仲有球罰球射中柱添，若非恩尼高馬天尼斯擺老烏，場波未必會輸，今晚主場出擊有權搶分。