江山如畫檔靚多人撐

猪拉多纳

　　早幾日落過雨，加上今期賽事冇咩標青好馬在陣，好多場隔晚飛都相當混亂，隨時爆個石破天驚都未定，都係捧冷門好啦。

　　噚晚發現有三匹馬因為排一至三檔，所以落好多飛（見表），而三匹馬之中，周某較為鍾意第七場「江山如畫」。唔知係咪因為呢匹馬今季兩仗都排外檔，所以獨贏賠率亦非常冷落，前仗有50倍，上仗則有25倍，但佢又算係跑得唔錯，兩次都入前四名。呢鋪佢縮程跑1000米，抽番個三檔，支持者立即返晒，隔晚得5.4倍獨贏，完全係搏殺格，一於跟番一注穩陣。

　　騎師王方面，過往韋達停賽，呢個固定彩池賠率通常都會七國咁亂，但係今次竟然搵到重心，佢就係莫雷拉，既然信心十足，點可以唔跟？