「重金屬蜜蜂」拮爆兵工廠

猪拉多纳

壓迫+反擊勁煞食

歐聯「死亡F組」上演重頭大戰，由上屆決賽分子多蒙特主場惡鬥英超1哥阿仙奴！雖然「兵工廠」啱啱喺英超擊敗利物浦，但「蜜蜂仔」上輪喺酋長球場殺敗對手，證明實力稍勝一籌，多蒙特今鋪回師主場，小妹認為「重金屬蜜蜂」可以「雙殺」阿仙奴，主隊讓半一，捧1.84倍上盤啦！

（有線61及201周四凌晨3:45直播）

多蒙特少帥高普出名大情大性，今仗賽前佢雖然大讚雲格「堅有料到」，又話阿仙奴嘅足球比巴塞更精彩，但就表明會用自己嘅風格令「兵工廠」陷入苦戰：「阿仙奴嘅足球優雅到好似交響樂團咁，可惜我自己鍾意聽重金屬音樂多啲囉！」近期嘅「蜜蜂兵團」的確經常攻到對手有氣冇碇抖，近兩仗對史浩克及史特加都取得大勝，證明「重金屬足球」的確係Work！
多蒙特作客對賽都贏2:1

「蜜蜂仔」上仗對「兵工廠」形勢上唔算特別佔優，但全場壓迫加快速反擊極度奏效，最終贏2:1，除咗因為羅拔利雲度夫斯基往往喺關鍵時刻取得「士哥」，馬高列奧斯同米希達利恩創造力一流，策動嘅攻勢當然到晒肉啦！今次多蒙特返到西法倫球場，有埋球迷瘋狂助威，絕對有條件再贏「兵工廠」o架！
阿仙奴中場韋舒亞打柴

阿仙奴上仗淨勝利物浦兩球，不過小妹認為紅軍表現喺水準之下，未必能夠作準，而且多蒙特嘅實力比利物浦高幾班，「兵工廠」喺主場已經拎唔到甜頭，唔係妄想作客有分落袋啩？仲有，阿仙奴件中場大將韋舒亞又話唔踢得，今晚對住7次喺主場鬥英格蘭球隊都未輸過嘅「蜜蜂仔」，睇怕都要輸多鋪喇。
Data King 「蜜蜂兵團」主場8連勝

‧多蒙特今季主場8戰全勝，合共攻入28球。

‧阿仙奴今季8場作客賽事中，僅得2場冇失波。

‧羅拔利雲度夫斯基喺今屆3場歐聯賽事攻入3球。
乜都玩錦囊 多蒙特入得又失得博入球大

論實力，多蒙特照計係喺阿仙奴之上，有近期弗到漏嘅羅拔利雲度夫斯基喺度，入波根本冇難度，不過值得留意嘅係「蜜蜂兵團」後防近期經常犯下低級錯誤，其中蘇保迪就係「甩轆」常客，以阿仙奴嘅把握力未必會食白果，1.5倍入球大雖然稍熱，但係用嚟做過關膽絕對可靠。