華倫西亞「屈機」狂揼聖加倫

猪拉多纳

今晚歐霸盃A組有西甲球隊華倫西亞作客瑞士嘅聖加倫，「蝙蝠軍團」喺聯賽戰績雖然差強人意，但嚟到水平較低嘅歐霸分組賽階段，仍然有力「屈機」，今場可望開出1.95倍客W，繼續向淘汰賽邁進。

（有線64及203周五凌晨2:00直播）
攻擊手皮亞堤 馬菲奧復出

華倫西亞今季12場西甲輸咗一半，排名跌到落第12，明顯已經唔再係昔日嘅勁旅。好彩「蝙蝠軍團」近排嘅作客戰績有所改善，最近5場外訪賽事獲得3勝1和1負，尚算穩定；雖然門將迪亞高艾維斯因傷踢唔到，但好消息係兩大攻擊手皮亞堤同馬菲奧都可以趕得切復出，拍住近兩仗歐霸都有波入嘅柏高艾卡沙，要擊敗聖加倫唔係難事。

聖加倫喺主場雖然尚算硬淨，今仗未必會重演上場分組賽作客華倫西亞勁輸1:5嘅慘況，不過呢支瑞士球隊近況的確麻麻，最近5仗只係贏過1場，3場分組賽亦都得3球進帳，火力薄弱，都幾難頂得住「蝙蝠軍團」喇！
歐霸盃A組