桌球一哥探班 車路士醒神

猪拉多纳

車路士主場對西布朗前，獲得特別嘉賓來臨打氣，佢就係桌球臨時世界排名第一嘅羅拔臣。

羅拔臣去到車仔科伯姆訓練中心探班，同隊長泰利打咗場美式桌球，又同桑馬達一齊「的」吓波露兩腳，呢名31歲澳洲球手仲話自己2002年開始愛上車路士，主要係畀當時蘇拿嘅球技所吸引。
對西布朗唔會失威

「啫哩仔」喺球隊開操前到達，同泰利喺飯堂篤番場友誼波，大讚呢名車路士隊長：「佢真係比我想像中勁好多，我只係開咗波，跟住佢就已經清枱，第二局好彩佢開波我清枱，一比一打和。」羅拔臣跟住同桑馬達落場輕舒腳頭，又大讚同鄉舒華沙係英超近10年最佳門將之一。

有世界一哥造訪，車路士嚟緊對西布朗又點會失威，事實上佢哋近年食住西布朗，加上伊度奧腳風順，贏兩粒輕而易舉啦，捧讓球主勝。