紅軍SAS主場做大騷

猪拉多纳

富咸防線冇料到

今季Yennie對利物浦特別有好感，點解呀？因為鍾意史杜列治搭蘇亞雷斯嘅「SAS」組合夠攞命囉！「紅軍」今季表現脫胎換骨，「SAS」合作4場已經炮製咗10個「士哥」，「咬人蘇」仲獲准踢埋今仗先向烏拉圭報到添，主場面對近3仗失9球嘅富咸，相信蘇亞雷斯實會交足貨先起行，1.46倍「入球大」係就係熱啲，但勝在穩陣吖嘛！

烏拉圭下星期三要去到中東同約旦進行世盃外圍賽附加賽，根據國際足協規定，國家隊有權喺比賽嘅5日前勒令球會放人，不過蘇亞雷斯日前主動要求踢埋今仗先向國家隊報到，烏拉圭領隊泰巴尼斯亦都話Okay，完場之後「哨牙蘇」會即刻搭私人飛機去伊斯坦布爾同國家隊會合，咁有心，睇嚟佢好想砌低富咸喎！
「咬人蘇」踢埋呢場先返國家隊

雖然話利物浦上輪聯賽慘吞阿仙奴兩蛋，但話晒「兵工廠」今季確係「托弗」，所以Yennie認為唔可以單單睇一場比賽，就否定「紅軍」嘅實力同狀態，況且史杜列治配「咬人蘇」呢對「SAS」組合真係好鬼入得，2人聯手4戰就貢獻10個入球，中場又有傷愈嘅菲臘比古天奴做支援，大把供應邊使愁冇波入吖。

利物浦近5場聯賽有4場開大，對家富咸亦都頻頻「大」，不過就係大鑊個「大」！呢支倫敦球隊近3仗輸晒之餘仲勁失9球，防線豆腐成咁點頂得住利物浦嘅進襲先？小妹相信今晚富咸又會有唔少失球出現，我就肯定會剝定花生等睇入波嘞！