朗尼 藍斯鬥入波 紅魔「大」戰廠仔

猪拉多纳

雙紅對決煞星撼死神

英超今晚爆發「大」激鬥，曼聯主場硬撼阿仙奴上演「雙紅對決」，焦點肯定係兩位大紅人朗尼同艾朗藍斯！「兵工廠煞星」朗尼由16歲開始已經專恰阿仙奴，「廠仔死神」艾朗藍斯今季就入波當食菜，既然紅魔要搶分收窄雙方差距，兵工廠就希望贏埋今場炮製「完美一周」，大家都咁有決心兼咁入得，1.72倍大唔捧點得呀？

（now621台周一凌晨0:10直播）
魔童專恰阿仙奴

喺阿仙奴身上累積攻入10個英超入球嘅朗尼，前日接受球會官網訪問時，就公然挑釁兵工廠：「曼聯有足夠能力擊敗阿仙奴，佢哋呢排係Fit，不過呢隊波過去6、7年都係虎頭蛇尾，去到3月就自自然然失咗蹤。」

「魔童」咁大口氣無他嘅，皆因呢位「兵工廠煞星」最鍾意搵阿仙奴攞彩，16歲嗰年幫愛華頓披甲，就用一球世界波射爆阿仙奴響朵兼攞到英超「處子球」，兩年後効力曼聯就係佢入波終止阿仙奴跨季49場不敗，就連個人第100個英超「士哥」都係對住阿仙奴射入。適逢廠仔呢期個勢咁好，睇怕又係「魔童」出嚟掃興嘅好時機，難怪朗尼咁話：「佢哋一見到我就唔舒服　」。
艾朗藍斯7場英超勁入6球

阿仙奴家陣拋甩曼聯8分排喺聯賽榜首，雖然佢哋對上9次喺聯賽造訪紅魔都未威過，不過門將施捷斯尼話，希望乘上周贏利物浦同周中勇挫多蒙特嘅勇勢，搞掂埋曼聯炮製「完美一周」喎，聽佢口脗，兵工廠今晚去到奧脫福唔似會踢得保守喎！

咁查實阿仙奴又的確夠本錢同紅魔鬥攻嘅，中場紅人艾朗藍斯近7場英超總共貢獻6球同3次助攻，加埋阿仙奴係英超唯一一支10輪聯賽都有波入嘅球隊，大家攻擊力都有保證，相信入波肯定唔會少。
Data King 廠仔英超唯一場場有波入

‧曼聯近9次喺英超鬥阿仙奴取得6勝2和1負。

‧阿仙奴係目前唯一一支10輪英超都有波入嘅球隊。

‧雙方對上4次交手有3次開大。
乜都玩錦囊 紅魔主場例爆廠再追

阿仙奴近年造訪奧脫福都冇好下場，對上5次作客曼聯全部輸晒，照攤路睇冇理由唔追曼聯，紅魔讓平半可敲上盤。