獅吼華麗足球「客」爆水手

猪拉多纳

澳職不敗之師中岸水手，今日會喺主場迎戰氣勢強勁嘅布里斯班獅吼，呢兩班波都擁有一條戰鬥力十足嘅中場線，水手出名夠硬淨，獅吼就以細膩見稱，不過阿占最欣賞獅吼件德國發電機布萊治，今場一於撐獅吼嘅華麗足球，開3.25倍冷門客W！

（有線64周日下午2:00直播）
水手開季4戰僅1勝

中岸水手話就話未輸過波，但查實佢哋開季4戰只得1勝，表現相當麻麻，雖然老將前鋒麥比連上星期完成喺中超嘅借用合約，已經返咗水手報到，不過呢位上季澳職金靴獎得主仍需時間重新適應，尤其前線嘅米歇爾杜基、馬高斯科利斯同麥西蒙都係新兵，大家仲需要時間磨合，今場未必可以寄于厚望。

布里斯班獅吼今季踢得幾精彩，對住FC悉尼同墨爾本雄心都拎到清脆利落嘅大勝，一條技術型中場更加係光芒四射，德國指揮官布萊治嘅控制節奏、個人技術同鋪橋搭路都令球迷留下深刻印象，雖然守將史堤芬魯圖同中場米拿受傷，但只要布萊治延續開季出色狀態，幫獅吼贏波應該唔成問題。
頂占筍盤：布里斯班獅吼（勝）