英超「雙史」齊齊捱「細」界

猪拉多纳

靠門將入波 Vs 射手打柴

今晚英超除咗「阿曼大戰」，壓軸仲有場中下游球隊對決，「白天鵝」史雲斯將會喺主場迎戰史篤城。兩軍近排嘅狀態都係麻麻地，冇咩鋒力，主隊史雲斯連續4戰不勝，上周喺「威爾斯打吡」輸波兼輸品，對面史篤城仲衰，已經連續6場贏唔到波，海軍鬥水兵，小妹預料呢場波會係悶戰一場，1.65倍入球細值得留意。
史雲斯Icon米捷抖半個月

史雲斯上周喺「威爾斯打吡」以0:1不敵卡迪夫城，最大鑊係佢哋呢場波乜都輸晒，唔單止門將禾姆領紅輸品要停賽，Icon射手米捷仲打埋柴，賽後證實要抖半個月，須知道呢位西班牙神箭開季至今已經入咗4粒，冇咗佢，單靠科特迪瓦前鋒韋菲特邦尼一個，入波又點會多呀？計一計數，連歐霸盃在內，史雲斯已經連續4場比賽不勝兼開「細」，正所謂無氈無扇，神仙都難變，乜架生都冇，今晚又點可能突然翻生開入球騷呀？

客軍史篤城狀態仲衰過「白天鵝」，喺各項賽事加加埋埋已經連續6場未開過W，上場聯賽喺主場同修咸頓1:1賽和執番1分，竟然要靠門將比高域喺開賽13秒大腳一踢，再加埋一陣怪風先僥倖入到波，唔通奇迹會連續有兩次咩？而且史篤城作客一向腳仔軟，開季至今只得1勝4負，今晚造訪史雲斯，相信都係死守為主，既然兩軍近況都咁曳兼無咩鋒力，買入球「細」就最穩陣啦！