正氣馬體會射穿蠱惑潛艇

猪拉多纳

今晚西甲有場唔錯嘅戲碼，由維拉利爾主場恭候馬德里體育會。「黃色潛艇」自從畀貝迪斯打破不敗身後表現反覆，試過主場炒華倫西亞四個一皮，但又可以淨吞基達菲兩隻光蛋，古靈精怪成咁仲點信得過？一路保持高水準演出嘅馬體會夠晒正氣，1.96倍客勝放心捧。

（now632台周一凌晨2:00直播）
維拉利爾表現飄忽

維拉利爾雖然成功進駐聯賽榜前列位置，不過隨住前線表現回落，成績亦連帶下滑，近6場波只得3勝3負，上仗幾經辛苦先喺補時階段憑前鋒烏捷入波，絕殺新升班嘅艾爾切，演出冇乜說服力，今晚對住由鐵衞高甸領銜嘅馬體會防線，想搵着數肯定唔容易！

反觀馬體會新季西甲加歐聯只係失咗10球，防線穩健當然係成績優異嘅主因，另一個原因就係前線孖寶韋拿同迪亞高哥斯達鬼死咁有火花，特別係迪亞高哥斯達，佢目前已經攞到13個西甲「士哥」，啱啱仲獲西班牙國家隊徵召入伍添，相信今晚又係呢位新進「鬥牛兵」嘅Show Time。