地頭惡爺維多利亞 搞寸高士路Party

猪拉多纳

計埋今輪聯賽，巴甲踢多5 Round就收咧，榜首高士路暫時以13分拋離次席帕拉尼恩斯，換句話講，只要佢哋聽朝作客鍊贏維多利亞，或者帕拉尼恩斯失分而佢哋保持不敗，就可以提早攞到球會史上第3個巴甲冠軍。不過咁，雷法爾覺得維多利亞主場表現硬淨，高士路未必話贏就贏，撐1.46倍「讓球主勝」。

（廣東體育周四早上7:50直播）
維多利亞搶分踢自由盃

無可否認高士路今季表現相當出色，但雷法爾對於聽日佢哋贏波就有保留。皆因高士路今戰有近3仗入2粒嘅中場艾華頓列比路停賽，中場尼頓費拉拿上仗已經話要靠打止痛針紮住上，要佢咁短時間內再踢多場波，表現又點會好先？加上域陀連奴、迪亞高雷蘭等3件後衞唔踢得，高士路今仗嘅隱憂都唔少。

維多利亞暫時落後第3、4位嘅甘美奧、保地花高2至3分，仲有望爭取下屆南美自由盃入場券，今仗肯定搏命。咪忘記佢哋今季聯賽主場16戰僅1敗，左閘桑馬當拿度又可以復出披甲，要搶分唔難。