葡萄牙弱細撼瑞典

猪拉多纳

伊巴率領眾臣群揪C朗

世界盃外圍賽歐洲區附加賽焦點大戰，葡萄牙主場鬥瑞典，兩大巨星基斯坦奴朗拿度同伊巴謙莫域，只有一人可以參加明年決賽周，肯定打甩髀。兩位超級射手碰面，自然令人聯想多入球，但咁又未必，畢竟足球係團隊運動，隊友配合好重要，C朗喺皇馬入球如麻，但葡軍整體攻力一般，加上主場想贏之餘亦唔想畀對手攞到作客入球，戰術難免傾向保守；至於伊巴率領一班「臣」級隊友去到里斯本，首回合必以保不敗為首要任務，因此呢場玩入球細為佳。

（now 632周六凌晨3時45分直播）
隊友唔多掂 入波冇咁易

C朗今季踢到曉飛，鋒芒蓋過勁敵美斯，莫非要爭口氣，希望力壓呢位阿根廷球王，當選國際足協金球獎，剝「美粉」白禮達棚牙？而佢亦肩負葡軍殺入世界盃決賽周嘅重要使命，故呢位皇馬射手肯定搏到盡。不過，理想同現實往往有距離，C朗喺「銀河艦隊」瘋狂入波，唔等於喺國家隊都有同樣產量，更常見反而係佢為國披甲時，因為隊友配合唔到佢，搞到發脾氣、攞黃牌，繼而沮喪嘅表情。

睇番C朗今屆外圍賽僅得4球進帳，而且對手仲要係魚腩盧森堡及北愛爾蘭，難怪被名宿尤西比奧寸佢淨係識喺弱隊身上入波。當然亦同葡國隊友太不濟有關，拿尼把握能力低兼獨食、曉高艾美達等前鋒起唔到掩護作用，C朗獲得嘅支援遠遠唔及喺皇馬，靠佢單打獨鬥，入波效率自然大減，更何況佢有傷在身，缺席日前操練，葡萄牙火力更令人擔心。另外，葡萄牙趁地利搶攻嘅時候，亦要提防被瑞典取得作客入球，畢竟對方前鋒係伊巴謙莫域，有後顧之下，唔敢太過冒進。
去屆世盃外 兩戰冇交收

瑞典首回合作客唔輸已經達標，次回合有地利，可重奪主動權，戰術上應會加強防守，估計伊巴謙莫域今場發揮機會唔多。瑞典球員技術粗枝大葉，中場卡斯唐無復當年勇，而主要戰力來自幾名効力英超嘅莊拿斯奧臣、馬田奧臣同施巴斯坦拿臣都係防中或後衞之材，面對葡萄牙控球在腳踢法，恐怕連攞波都有難度，相信只能採取先穩守及長傳突擊搵食，攻勢難入肉。翻查往績，兩軍喺上屆世盃外兩次交手都係互交白卷，細盤值得再追。