西班牙擺明屈畿贏３粒冇問題

猪拉多纳

今晚國際熱身賽，世界盃及歐國盃雙料盟主西班牙作客非洲赤道畿內亞。眼見弗爆嘅歸化箭頭迪亞高哥斯達喺西甲傷出，幾名西班牙前鋒如韋拿、尼格度、洛蘭迪仲唔趁機搏盡爭位咩？赤道畿內亞連世盃外第3圈都入唔到，屬非洲三流波，就算有地利都係等劏格，西班牙讓2球濕濕碎，照撐讓球客勝。

（now 632周日清晨5時直播）

人氣爆燈嘅巴西裔箭頭迪亞高哥斯達幾經波折，終於如願入選西班牙，點知又因右腳肌肉撕裂被迫退隊，真係好事多磨。不過，曼城大舊佬尼格度講到明唔驚同「迪哥」競爭，仲話佢每次出場都會搏甩髀，近兩場代表「狂牛」都有士哥，撻着晒勒都勒唔住。因「迪哥」退出獲領隊迪保斯基補選嘅洛蘭迪，近期喺祖雲達斯有復甦迹象，雖然未必有得踢正選，若有機會落場定必騷吓哥利。
赤道畿內亞三流貨色

至於西班牙史上首席射手韋拿，以為轉投馬體會有運行，豈料畀拍檔迪亞高哥斯達搶晒風頭，依家佢仲做埋鬥牛士，隨時搞到韋拿冇碇企，好彩今仗遇啱近5場未贏過、早喺世盃外第2圈B組排包尾嘅赤道畿內亞，實力曳到冇朋友，絕對係畀呢班射手磨利刀、冧迪帥嘅好時機，要贏3粒冇難度。