科特迪瓦食「塞」話咁易

猪拉多纳

主隊焗攻有利打反擊

世界盃非洲區外圍賽終於嚟到最後一輪賽事，首回合喺主場領先3:1嘅科特迪瓦，將會喺今晚第3圈次回合賽事「作客」鬥塞內加爾。話就話係作客，其實呢場比賽喺摩洛哥嘅卡薩布蘭卡進行，換言之塞內加爾佔唔到地利。科特迪瓦人腳星光熠熠，加上形勢主動，想贏多次焗攻嘅塞內加爾唔難，1.68倍客勝唔好錯過。

（開賽時間：周日凌晨3:00）
塞內加爾缺少派牌球員

手握兩球領先優勢嘅科特迪瓦，今仗可以疊埋心水打穩守突擊。前線有曾効力車路士多年嘅杜奧巴同沙洛文卡勞，反擊效率唔成問題。另外今季喺羅馬重拾水準嘅翼鋒謝雲奴亦趕及傷愈復出，以佢首回合搏到12碼又送上助攻嘅勇態，今仗對住大舉進攻嘅塞內加爾，相信有更多空間幫隊友鋪橋搭路。雖然中場迪奧迪停賽，守將迪爾尼休戰，但球隊仍有耶耶托尼同高路托尼兩兄弟指揮大局，有力抵擋塞內加爾攻勢。

至於想出線就至少要入兩粒嘅塞內加爾，就有前鋒丹巴巴亞同後衞蘇利文尼迪亞華拉落選大軍名單。前線數胡人物得番紐卡素射手柏比斯施斯、馬美迪奧夫同蘇維等戰將，「卡士」稍遜，而且佢哋欠缺派牌球員提供彈藥，中場名氣最大嘅球員已經係韋斯咸工兵迪亞美，今次遇上專心防守嘅科特迪瓦，只怕破門乏力，隨時因為愈壓愈前畀人快速反擊得手。