高盧雞復活得番兩個機會

猪拉多纳

世盃歐洲區附加賽首回合激戰連場，其中法國爆冷淨吞兩蛋敗走烏克蘭，形勢危殆，Peter認為佢哋次回合剩番兩個機會——就係渺茫同冇機會！有好多球員踢而優則教，貴為法國連奪世盃同歐國盃嘅冠軍級隊長，雖然曾帶領馬賽重奪聯賽錦標，但迪甘斯仍未證明自己係一流領隊，始終教波最緊要係成績，依家淪落到要踢附加賽，對住實力唔算強嘅烏克蘭都搞到一鑊粥，除非佢喺周二晚嘅次回合能夠力挽狂瀾，否則前程似「咁」。
教頭唔夠料 人腳未夾掂

畢竟法國係名牌球隊，如此輸波令人始料未及，不過Peter唔係咁睇，現時呢班法國兵質素麻麻，門神洛里斯不時蝦碌唔太穩陣，後衞哥斯尼乃莽夫一名，經常衰衝動攞牌累街坊，拿斯尼太過英雄主義，以為自己一個搞掂晒，喺講求整體合作嘅足球運動中，總係格格不入。

至於金球獎熱門之一嘅列貝利雖然好波，但「高盧雞」與拜仁嘅體系差天共地，加上成為眾矢之的，雙拳難敵四手，「疤面煞星」亦難單天保至尊。如今法國已經今非昔比，千祈唔好畀佢哋嘅名氣呃到。
金句：法國周二晚在巴黎的最後探戈