八運寶升班無阻力

不死鸟

除了來自南非的練馬師苗禮德與霍利時，吳定強與南非馬其實也頗有緣份，昔日養過「煙花燦爛」及「勝德寶」，現役就有「剛剛好」和一對新轉倉的「百利旺」和「金同德」，今季還來多一匹自購馬「同德寶」，於今晚夜賽粉墨登場；這匹「勝德寶」同主馬，響南非跑五場處女馬賽，要到最後一仗才開齋，先前四場得三亞一季，惟水準不高。
「同德寶」兩線血統充滿美洲色彩，老豆WINDRUSH於原產地五勝1400至1800米，包括三級賽，退役後轉在南非打種，母親於南非出賽，期間贏過一場1600米，產下首胎「同德寶」在彼邦贏1450米，並於1600米上過名，血統和賽績皆顯示最擅中距離，初出角逐短途1200米，縱有新鮮感也只宜留意走勢，純美國血統馬將來跑泥地更易搵食。
「八運寶」同父馬「孫子奇兵」、「京城孖寶」乃谷草專材，上仗首次過江贏馬唔奇，以其新馬時曾與「同一世界」相約過終點，又跑贏過「幸運勇將」，往績套落今場，三班恃輕磅一樣有威力。