法國拚死無大害

猪拉多纳

烏雲密布夜巴黎 誓破世盃「4亡」魔咒

今晚世盃歐洲區附加賽次回合，法國回師主場再鬥烏克蘭，首回合淨吞兩蛋嘅法國，被逼到埋牆角，已經無路可退，為爭出線兼破近10屆逢「4」字尾年份必入唔到世盃嘅魔咒，勢必盡地一煲，不過法國玩強攻反而啱晒烏軍打反擊，加上雙方都有主力中堅停賽，呢場生死戰隨時變成入球騷，揀大盤最穩陣。

（now 635周三凌晨4時直播）
賓施馬掛帥絕地反擊

首回合法國作客輸0比2之餘，亦搶唔到作客入球，意味住佢哋今仗要淨勝3球或以上先可出線，就算贏番2比0都要踢加時，因此法國冇得諗只有焗攻。上仗主帥迪甘斯太過保守，正選竟然收起箭頭賓施馬，實在係棋差一着，呢位皇馬射手近期有回勇迹象，不但打破入球荒，佢喺前線串連進攻嘅能力，可減輕核心列貝利嘅組織重擔，喺呢場必須爭取士哥嘅生死戰，預計迪帥會復用賓施馬攻堅，配合拚命三郎華布拿及擅於鑽營嘅雷米，甚至防中保羅普巴及卡比耶遠射堅勁，撞啱對方中堅古查要坐波監，好難頂得住全民皆攻嘅法國。

睇番近10屆世盃，法國有3屆未能殺入決賽周，而其中包括74同94年，可見逢「4」字尾嘅年份對佢哋都唔多老利，而明年巴西世盃又適逢4字尾年，依家佢哋又身陷困境，都咪話唔邪。法國背負住傳統勁旅嘅壓力，如果外圍賽出局，對整個法國都係一個沉重打擊，故為咗打破呢個「4亡」魔咒，法軍必定火力全開。
烏克蘭魔翼最叻偷襲

然而針無兩頭利，後衞艾比度老態畢露，其拍檔哥斯尼上仗衰衝動領紅被逐，今仗要坐波監，最弊係連皇馬新星華拉尼都傷埋，得番馬馬度沙高可出任中堅，無論默契定經驗都輸蝕，撞啱烏克蘭嘅耶莫蘭高同高路比恩卡威脅極大，法國谷得太上搞到後防空虛，隨時會畀呢對魔翼偷襲得手，相信呢場士哥唔會少，入球大乃不二之選。

猪拉多纳