一球在手+C朗領軍 葡萄牙唔赦瑞典

猪拉多纳

另一場焦點附加賽次回合，上演C朗鬥伊巴謙莫域嘅好戲，首回合C朗技勝一籌，入波做英雄，葡萄牙領先1比0。今仗輪到瑞典主場，預料攻防形勢逆轉，由伊巴謙莫域發辦搶攻。不過，瑞典進攻套路單調，想收復失地並非易事，若然壓得太前，隨時又畀C朗突襲成功，葡萄牙小讓平半，上盤好路。

（now632周三凌晨3時45分直播）

葡萄牙首回合佔盡上風，C朗除咗頂入1球，仲有一次頭槌中楣，其他隊友亦不乏破門機會，如果把握力好些少，唔止贏一球。當然葡國上仗有地利，自然有着數，但事實上，論人腳質素，逐個秤都喺瑞典之上，進攻方面，C朗固然出色，後防比比亦值得一讚，成功凍結伊巴謙莫域，攻守能力皆勝瑞典。最重要係葡萄牙控球能力較強，作客揸住一球在手，大可以搓住嚟踢，等瑞典谷前，再利用C朗嘅速度優勢去搶作客入球。
全力嘜死伊巴

瑞典首回合屯重兵一心死守，但最終都係頂唔住，肯定洩氣。球隊太過依賴伊巴謙莫域，一旦佢死火，即刻冇晒反擊力。葡萄牙有領先優勢，可以投入更多力量布防，只要將呢位巴黎聖日耳門射手凍結，就可以斷瑞典「龍脈」。瑞典後防亦唔算穩陣，上仗全靠門將伊沙克臣超水準發揮，否則可能已大敗，形勢好悲觀。

值得一提，葡萄牙喺上屆世界盃及上屆歐國盃都係踢贏附加賽晉級，心理優勢遠比瑞典強，只係小讓平盤，上盤有計。