葡萄牙讓得起瑞典

猪拉多纳

比比「冰封」伊巴謙

世盃外歐洲區附加賽今晚嚟到次回合終極生死鬥，焦點戰當然係瑞典鬥葡萄牙，唔少人都話係伊巴謙莫域同C朗嘅對決，但牡丹雖好都要綠葉扶持，「凍結專家」比比上場嘜到伊巴謙一戙都冇，助葡軍小勝1:0，就算瑞典今晚返主場踢，領隊咸雲又話轉打唔擅長嘅小組進攻博一博，咪盞衰多兩錢重，葡萄牙讓平半力奇撐2.15倍上盤！

（now632台周三凌晨3:45直播）

葡萄牙喺首回合憑C朗「一頭定江山」小勝瑞典，換句話講，瑞典今晚非勝不可，焗攻後防易有漏洞，肯定益晒葡軍，特別係重心C朗同拿尼都係速度、技術兼備，打快速反擊最易搵到食。再者，瑞典領隊咸雲賽前突然放風，話唔滿意首回合隊員喺進攻上打得太多長波，對雙箭頭伊巴謙同艾文達又支援不足，話明今場要加強控球在腳，造多啲波。但試問以瑞典班球員腳法，要喺個個都扭得兩嘴嘅葡萄牙國腳面前玩小組，根本係班門弄斧，攞嚟衰啦！
瑞典改踢小組效果唔掂

更重要一點，睇番首回合戰況，瑞典同葡萄牙根本係唔同級數，葡軍全場控球率高達68%，瑞典只得32%，即係瑞典連波都唔多攞到，仲點去搓波先？

至於話睇好伊巴謙今晚喺主場可以發威，冇錯，今晚比賽嘅朋友球場自從上年啟用，呢位瑞典球王喺度踢8場勁入10球，之但係首回合佢喺葡萄牙「狂人」比比全場緊盯下，竟然只得1次射門同30腳傳送，想佢次回合有脫胎換骨演出，睇嚟難啲囉！反觀葡萄牙中場摩天奴上場自己一個就有102次傳送，C朗有佢幫手，肯定大把機會射爆瑞典啦！
葡萄牙往績贏晒讓波夠狠

仲有一點，葡萄牙近5次作客瑞典取得3勝2和佳績，連往績都贏埋，自信心都多啲。查實莊家開盤，葡萄牙作客都要讓平半，相當狠吓，睇嚟真係對佢哋幾有信心喎！
Data King

葡萄牙8鬥瑞典不敗

‧伊巴謙莫域喺朋友球場8戰入10球。

‧葡萄牙近8次鬥瑞典取得3勝5和不敗戰績。

‧葡萄牙近5次出訪瑞典得3勝2和，有4場開入球細。
乜都玩錦囊

交手旺開細繼續追

瑞葡戰實力接近，戰況肯定緊湊，大家都唔敢亂博，點睇都唔似多入波。再睇埋瑞典主場鬥葡萄牙往績，又係旺入球細，今場1.65倍細抵玩！
首回合：瑞客負0:1