皇者拍檔飛到馬到

猪拉多纳

　　今晚八場賽事跑馬地馬場舉行，發現有兩場大熱門獨贏賠率曾經連2倍都冇，佢分別係第二場「信眼光」同埋第八場「喜多盈」，究竟係咪咁犀利？跑過先知。

　　噚晚睇飛，發現第七場「皇者拍檔」今次排九檔一樣有飛落，隔晚個W曾得8.9倍，睇番佢賽績，其實得三戰獨贏賠率10倍及以下，但係三次都可以跑入前五名，成績係一亞一季同一席第五（見表），呢匹馬係咪飛到馬到？大家有目共睹，呢鋪有人隔晚就支持定佢先，睇都係搏殺格局，若果今晚開跑前，佢個獨贏仲到10倍及以下，真係要買注博一博啦。

　　騎師王方面，今次莫雷拉停賽，但潘頓同韋達竟然有2倍半以上，唔多似得，反觀安國倫得五匹坐騎，但又得6.5倍，要捧。