烏拉圭墨國齊歎細界

猪拉多纳

首回合大勝約旦新西蘭夠皮

明年世盃32強席位幾乎塵埃落定，今日上演最後兩場世盃附加賽次回合，分別係今午新西蘭主場對墨西哥，及明早烏拉圭主場對約旦，由於墨、烏喺首回合贏到開巷，嗰張入場券可謂手到拿來，令今仗變成例行公事，戰意成疑，兩場揀晒入球細冇衰。

先講吓墨西哥，佢哋喺冇徵召杜斯山度士、查維亞靴南迪斯等外流球星嘅情況下，首回合以5比1大炒新西蘭，證明雙方實力差幾條街。新西蘭話晒返主場出戰，點都要向球迷交代，教頭歷奇靴拔講明唔會投降一定拚盡，奈何佢哋嘅進攻只屬有限公司，面對遙遙領先、Hea住嚟踢嘅墨西哥，隨時悶戰一場，細盤有1.95倍分頭非常抵玩。

（周三下午2時開賽，馬會網上文字直播）
哨牙蘇留力踢英超

至於烏拉圭方面，儘管蘇亞雷斯上仗冇士哥之餘，仲畀約旦球迷高舉印有佢上季咬車仔守將伊雲洛域嘅橫額寸爆，但畢竟首回合作客豪贈約旦五隻光蛋，出線已無懸念，其他隊友嘅鬥心亦冇佢咁堅。加上嚟緊周六英超早場利物浦將作客愛華頓合演默西賽德郡打吡，紅軍班主約翰亨利專誠出動埋自己架私人飛機，打完呢場附加賽就送阿蘇返去備戰。

老闆咁細心，哨牙蘇梗係識做唔會搏殘喇，可能數一兩粒就收韁，約旦又無力破蛋，加上今仗大細中位數調至3.5球，不妨捧1.9倍嘅入球細。

（周四早上7時開賽）