獅吼 流浪者矛盾對決博和波

猪拉多纳

澳職今晚爆發榜首大戰，由布里斯班獅吼挑戰上季常規賽冠軍西悉尼流浪者。擁有澳職最強鋒力嘅獅吼，主場戰績一向有保證，不過流浪者嘅防守力亦係澳職No.1，最強之矛攻最強之盾，實在好難分出高下，一於博3.15倍和波啦！

（有線64周五下午5:00直播）
流浪者開季6戰僅失3球

西悉尼流浪者自上季成軍以嚟，一直Keep得住個氣勢，佢哋今季踢咗6場，雖然每場入波都只係一球起兩球止，攻擊力唔算太強，但係佢哋勝在防守非常穩健，至今只係失咗3球咋！其中小野伸二喺中場發揮嘅作用實在功不可沒，呢位前日本國腳日前更以年度文化大使身份，為喺澳洲舉行嘅日本電影節主持開幕禮，可以見到佢嘅人氣有幾勁，有佢同班後防拍檔喺度，今仗作客要搶分都唔係冇可能。

主隊獅吼喺地頭出戰夠晒硬淨，今季踢咗兩場波轟入7球兼保持不失，實在有賴軒歷基安達迪等攻擊手保持水準。可惜佢哋今場面對嘅係流浪者，防線實在比其他對手穩健得多，加上獅吼上仗對住實力差唔多嘅紐卡素噴射機，最終都要輸1:2，反映佢哋條防線存有漏洞，今鋪面對住流浪者，睇怕打個和都收貨喇。