悉尼火力全開主勝咪嫌熱

猪拉多纳

鳳凰兵疲未到開齋時

澳職嘅FC悉尼經歷過開季令人失望嘅表現後，好彩最近連贏兩場打番起信心，今日主場對威靈頓鳳凰，重有新箭頭迪斯普杜域首次披甲上陣。有咗呢個塞爾維亞國腳拍住前意大利金童迪比亞路攻堅，咁嘅牌面都算係澳職最有卡士嘅前鋒組合啩？面對住兩支大炮，睇嚟今場威靈頓鳳凰聽做炮灰都得嘞，一定捧1.59倍主勝啦！

（有線64周六下午2:30直播）
新援迪斯普杜域可披甲

FC悉尼後防堤亞高高爾浩早前向球證作出攻擊性舉動，唔單止今場要停賽，之後重要喺11月27日聽埋紀律委員會判決，先至知會唔會面臨更嚴厲懲罰，或者再被罰停賽耐啲。好在佢哋隊波已經火力全開，近兩場聯賽攻入五球，迪比亞路更加係兩場都有波入，顯示狀態唔錯，況且呢場仲有由浦和紅鑽加盟嘅迪斯普杜域上陣，攻力真係唔成問題。

威靈頓鳳凰開季到依家重未開齋，踢呢場之前，重有半隊被新西蘭國家隊召咗返去踢兩場世界盃附加賽，無論精神同體力都消耗得好厲害。唔好忘記威靈頓鳳凰對上一次作客FC悉尼，就出現以「7個1皮」慘敗嘅恐怖戰果。今場有咁多不利因素圍繞，可以偷雞嘅機會極之渺茫。
頂占筍盤：FC悉尼（主勝）