修咸頓銅牆鐵壁 兵工廠讓唔起聖人

猪拉多纳

因為國際賽期嘅關係，上星期英超暫停戰火，唔少英超迷惟有睇住英格蘭國家隊止吓渴先。講開「三獅兵團」，除曼聯有6個球員入選成為最大戶外，原來修咸頓都有3席，入選成員比曼城、阿仙奴同車路士仲多，證明修咸頓今季的確有料到，今晚佢哋造訪阿仙奴，小妹覺得阿仙奴未必讓得起一球，一於捧3.4倍讓球主客和嘅「和」啦！

（now621台周六晚11:00直播）

修咸頓3位英格蘭國腳，分別係射手列基林拔，鋒將積洛迪古斯同埋隊長拉爾拉拿，以佢哋為骨幹嘅修咸頓今季表現確實令一眾球迷眼前一亮，開季至今11戰取得22分，壓過車路士、曼聯、曼城同熱刺等列強，暫時排積分榜第3位，同榜首阿仙奴只差3分，可見「聖人」絕對唔係善男信女。
禾確特剛傷愈狀態成疑

「兵工廠」目前嘅十字軍名單絕對唔短，阿歷士張伯倫喺揭幕戰受傷，康復情況唔理想，預料要到2014年先可以再披甲上陣，德國國腳普多斯基喺8月受傷，復操無耐仲未踢得。唯一好消息就係英格蘭翼鋒禾確特傷愈復出，預料今晚可以倒戈舊東家修咸頓，但始終都係傷愈後首場正式比賽，一定未回復弗爆狀態。

阿仙奴今晚喺自己主場出擊，話晒今季5場主場比賽贏4場，主場威力有番咁上下，小妹相信佢哋今晚可以小勝修咸頓，但讓球就未必讓得起啦！另邊廂，修咸頓今季11場比賽中只失5球，平均2場先失1球，暫時係英超防守力最強球隊，咁穩陣嘅後防「讓球和」應該可以開出。