劍飛聲難覓敵手

猪拉多纳

　　輪流贏，輪流威，係不變定論，呢排阿蔡當「老行」，唔可能不停贏至十二月，唔通可以殺到2014年咩。所以，冇話邊個可以獨霸武林，有時你叻啲，有時我威啲，大家先襟玩。至於今次邊個威？問心講，老蔡睇高一線，摩方也不要睇小。

　　第三場三班1200米。「劍飛聲」上仗一出即勝，呢類蔡廐新馬話贏就贏，質素一定唔簡單，坐住二班冇問題，所以，升上三班負磅輕咁多，更加唔會遇到阻力。

　　再講，呢場三班賽對手真係唔多，嘩，大家睇吓有邊匹有好近績，係冇呀！出過賽嘅，冇1隻啱啱上到名，再唔係就係未在港跑過嘅質新馬，咁嘅賽事水準，點可能難倒呢匹新勝馬。

　　第八場三班1400米。「贏到爆」阿棟之前已經捧過1次，表現未見好轉，但係今次就有啲唔同，除咗出面有「風聲」之外，交番畀柏寶策騎，應該係真波，因為上季唯一上名就喺佢手上。

　　另一方面，「贏到爆」跑完兩場後，方仔繼續俾佢加程發展，唔會係冇實質作用，好可能等到匹馬跑到夠嘞，先至在最合腳法路程上陣，以求一擊即中。

　　第十場二班1400米。唔怕猜猜「步步友」前景，我認為有資格挑戰4歲馬系列賽，最終贏唔贏到打吡，有時真係睇運數、命水，講到尾就肯定值一班。

　　步步友尾場穩膽

　　今次為「步步友」季內第2仗，狀態有增無減係可以預期，大摩向來識做，呢系馬跑得一定唔欺場，尾場穩膽。(陳華棟 資深評馬人)