智哥瑞比4件強隊豬頭骨

猪拉多纳

精彩刺激嘅世盃外圍賽附加賽啱啱落幕，32支參加明年決賽周嘅球隊亦全部落實，一眾傳統勁旅順利取得入場券，陣中球星一大堆，人人都識，因此今日Peter想同大家傾下，四支來自南美及歐洲嘅二線球隊、強隊最怕嘅豬頭骨。

智利坐擁射術精湛嘅巴塞球星阿歷斯山齊士，身後嘅維達爾、加利美度、伊斯拿等能攻擅守嘅工兵，並喺上屆世盃累積咗一定嘅經驗，有機會更上一層樓。哥倫比亞有摩納哥孖寶法卡奧同占士洛迪古斯助陣，默契十足，喺阿根廷主帥柏加文帶領下，充分激發出佢哋嘅進攻潛力，而智利同哥倫比亞均屬南美球隊，出戰巴西舉辦嘅世盃，猶如有半個主場之利，點都有着數。
隨時成巴西世盃驚喜

至於歐洲方面，瑞士絕對不容忽視，除咗効力拜仁嘅翼鋒梳頓沙基利及拿玻里中場恩拿比較突出之外，大部分球員都實而不華，配合名帥希斯菲特嘅整體戰術，喺世盃外圍賽保持不敗，強隊遇着佢哋都幾頭痕。

最後就係不再神秘嘅比利時，呢支歐洲紅魔依家踏入多年青訓嘅收成期，無論係後防嘅高柏尼、華美倫、維頓漢，定係中場嘅夏薩特、費蘭尼、奇雲迪布尼、迪比利，個個都獨當一面，雖然盧卡古及賓迪基未算頂級前鋒，但世上邊有完美球隊呢？上述四隊不但會成強隊豬頭骨，隨時喺明年巴西世盃為球迷帶來驚喜。
金句：二線國家一線勁旅love to hate（鬼見愁）