曼城地獄主場 打殘死火熱刺

猪拉多纳

5戰全勝喪入20球

曼城地獄主場博翻身！自從1967至68球季打後，冇一支球隊能夠喺開鑼頭11戰入面輸4場或以上最終可以封王，矢志重奪錦標嘅曼城要打破宿命，今晚鬥熱刺絕對不容再失。好彩曼城今季主場打遍無敵手，場均4個士哥嘅超級火力更係英超之冠，相信有「主場士哥王」阿古路領銜鋒線嘅「藍月亮」可以砌低冇牙老虎熱刺，讓半一要上盤。

（now621台周日晚9:30直播）

之所以話曼城球場係地獄主場，皆因佢哋係英格蘭頭4個級別嘅所有球隊當中，唯一開季主場全勝嘅隊伍，更加得人驚係5場勝仗總共喪入20球，當中阿根廷射手阿古路就入咗5球，就算大衞施華因小腿受傷仲未可以候命，有捷西斯拿華斯同拿斯尼做側擊，阿古路同尼格度都肯定有大把供應，真係唔使擔心冇波入。
藍月亮大衞施華 高柏尼有傷

雖然話隊長高柏尼大腿傷未好番，不過中堅拿斯達錫同悍將費蘭甸奴已經傷愈，中後場硬淨番好多。最重要係赫特剛啱為英格蘭披甲鬥德國場熱身賽有好表現，《曼徹斯特晚報》預測，上仗失波累曼城倒灶輸畀新特蘭0:1嘅彭迪利蒙會退居後備，赫特或有望做番正選，姑勿論今晚邊個擔正把關，為咗坐個正選位都必定會醒醒定定啦！
熱刺入波少過下游球隊

上輪英超同樣輸波嘅熱刺，對紐卡素場波明明有成31腳攻門，睇落係贏形勢輸波，你話佢哋冇運咩？亨格比利就話佢哋把握力差嘞！睇番數據，熱刺今季英超入得9球，仲少過排下游嘅史篤城同富咸，11輪聯賽得4位球員（蘇爾達度、基菲爾施古臣、安祖斯唐辛同荷西保連奴）入波更屬英超最少。加埋OPTA數據顯示，熱刺有42%攻勢係經由安祖斯唐辛喺右路發動，進攻單調之餘攻擊點又少，今晚仲想喺曼城個地獄主場搵着數？
Data King 熱刺作客曼城3連敗

‧熱刺近3次造訪曼城輸晒。

‧唔計周六賽事，熱刺係英超射門最多球隊，但5.7%嘅轉化入球率則係英超至差。

‧曼城今季英超主場只失2球。
乜都玩錦囊 下半場先駁火捧半細

曼城主場戰績咁癲，預計熱刺今晚唔會輕舉妄動，領隊保亞斯又最興搵蘇爾達度出任單箭頭，睇個勢開波初段會先求穩陣打突擊。翻查往績，雙方近4次喺英超交手炮製咗18球波，當中竟然有14球波係嚟自下半場，玩1.45倍半場細好路呀！